W Rakecach nastanje strowotniski centrum
Rakecy (SN/BŠe). Zo so hižo wjacore kupnicy we wsy při zwjazkowej dróze B 96 hižo njewužiwaja, je njezrozumliwe. Tole pokazachu tež diskusije, hdźež dźěše wo to w Rakecach nowu kupnicu Netto zaměstnić. Inženjer Rudolf Rychtar, kiž zdobom we wsy bydli, starosće ludźi derje znaje a měješe ideju w jednej z mjeztym třoch prózdnje stejacych twarjenjow strowotniski centrum zarjadować. Loni wón ideju zrodźi a lětsa spočatk januara je bywšu kupnicu Penny, hdźež bě zdobom hosćenc Waikiki, kupił.
Zo njeby wulce čas dlijił, je wón zhromadnje z dźowku Danielu, kotraž bě architekturu studowała, projekt zhotowił. Hižo w měrcu hrube plany stejachu, tak zo móžeše so Rudolf Rychtar wo spěchowanske pjenjezy programa Leader prócować. Přiwšěm je hišće předewzaćelsku towaršnosć załožił. Čas za twar strowotniskeho centruma tłóčeše, wšako měješe hižo prěnje zajimcy, kotřiž chcychu prawje bórze do domu zaćahnyć. 12. meje je inženjer kluče za twarjenje dóstał a w juniju sćěhowaše twarska dowolnosć.
