Lětuše wjedrowe wobstejnosće ratarjow chětro wužaduja
Budyšin (SN/BŠe). Suchota nima lětsa žanoho kónca a po wšěm zdaću hišće dale traje. Kaž wjedrarnje wěšća, njebudźe přichodne šěsć dnjow žanych wjetšich spadkow. Hižo wot meje njeje so wulce dešćowało, zo móhli so rostliny na polach a łukach a štomy na zahrodach derje dosć wuwić. Přiwšěm njehodźi so to cyle pawšalnje za wšitke kónčiny we Łužicy rjec. Wjedrowy fenomen dźě bě wosebity. Mjeztym zo je so z blakami lało, njejsu ludźo druhdźe ani kapku spadkow měli. Hladajo na ratarske zawody su tak pod wuskutkami suchoty njesměrnje ćerpjeli a maja tak wjele mjenje wunoškow.