Lětuša sezona we Wochožanskim parku błudźenkow zahajena

Wochozy (AK/SN). Serbsku rěč, kulturu a stawizny we Wochožanskim parku błudźenkow wulce připóznawaja. „Mamy flajer w serbskej rěči, tež internetnu stronu, štož bě wulke wužadanje. Wobstajnje wustupuja tu serbscy wuměłcy“, podšmórny předsyda spěchowanskeho towarstwa Łužiskeho parka błudźenkow Ulrich Klinkert wčera na oficialnym zahajenju sezony. „Začuwamy dwurěčnosć jako bohatstwo, a chcemy k tomu přinošować, je dale rozmnožić.“ Z wustajeńcu „Wróćo ke korjenjam. Měnjate stawizny serbskeje wsy Wochozy“ je spěchowanske towarstwo parka zhromadnje z předsydu Domowiny Dawidom Statnikom, sakskim ministerskim prezidentom Michaelom Kretschmerom (CDU) a krajnym radu wokrjesa Zhorjelc Berndom Langu (CDU) lětušu sezonu wotewrěło.