Doma z optimalnym wudobytkom

wutora, 10. septembera 2019
artikl hódnoćić
(0 )
Klemens Mark (při bulu, Chrósćicy) honi z bulom do směra na přećiwniske wrota. Třělc rozsudneho 1:0 pak bě Dobroščan  Syman Handrik (nalěwo, Chrósćicy).  Foto: Konstantin Hrjehor Klemens Mark (při bulu, Chrósćicy) honi z bulom do směra na přećiwniske wrota. Třělc rozsudneho 1:0 pak bě Dobroščan Syman Handrik (nalěwo, Chrósćicy). Foto: Konstantin Hrjehor

SJ Chrósćicy II

– HZ Hórnikecy/Ćisk II 1:0 (0:0)

Zestawa domjacych: Dórnik – M. Donat, F. Cyž, Šiman, Mark, Handrik (81. J. Donat), Domaška, Matješk, Mohaupt, Liznar, M. Cyž

Po hórkej poražce w serbskim derbyju w Njebjelčicach wočakowaše koparska rezerwa Chróšćanskeje SJ Hrajne zjednoćenstwo Hórnikecy/Ćisk II.

Wězo chcyštej wobě mustwje dale dyp­kować, wšako nochcyštej jednocy­fro­we zaměstnjenje z wočow zhubić. Hra­jerjo na trawniku pak trjebachu někotre mjeńšiny, prjed hač so prěnje dlěše kombinacije poradźichu. Wšitcy tasachu­ so pomału do partije a koncentrowachu so wosebje na škit swójskich wrotow. Tohodla wotměwaše so hra wosebje mjez šěsnatkomaj. Wulke móžnosće běchu jara­ rědke, dokelž so rozsudne přihrawki přehusto njeradźachu. Tež wysoke přihrawki do nadběha so wjacore razy nimokulichu a tak wuskočichu najlěpše móžnosće prěnjeho połčasa po wólnych kopach abo róžkach. Tak by bjezmała k nawjedowanju za Chróšćanow dóšło, tola po runje tajkim róžku z lěweje strony bul wrota wo mało centimetrow misny. Krótko po tym by so Michałej Do­natej nimale 1:0 poradźiło, jako so jemu bul do šěsnatki wotsuny a skoro do dołheho hornjeho kuta zadyri (35.).

Druhi połčas započa so tohorunja poměr­nje měrnje, a mnozy ličachu dale z wurunanej hru bjez wulkeje nadwahi domjacych. Hač do 64. min. so ničo naspomnjenjahódne njesta, skónčnje pak smědźachu Chróšćenjo juskać. Po njepřewidnej situaciji w šěsnatce hosći so Symanej Handrikej poradźi kulowatu kožu­ někak do wrotow połožić. Krótko po tym so wjedro njejapcy pohubjeńši, wulke mróčele njebjo zaćěmnichu a ze sylnym wichorom kombinowany dešć pohnu sudnika, hru přetorhnyć. Po trochu dlěšej přestawce, w kotrejž dyrbjachu wšitcy hrajerjo a sudnicy do pře­drasćernjow, partiju zaso zahwizdachu, a hosćo ćišć hišće raz zesylnichu. Na zbožo pak njemóžachu wurunać, dokelž sej sami na puću stejachu. Z wulkim za­sadźenjom domjacy nawjedowanje hač do kónca zakitowachu.

Wažne druhe dobyće na domjacym trawniku w sezonje zbudźa nadźiju Chróšćanskich koparjow na dalše dobre wukony w přichodnych hrach.

Klemens Mark

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND