Minister potwjerdźa potrjebu za wjace regionalnymi wudźěłkami

Berlin (SN/MiR). Tójšto nowosćow wita wopytowarjow lětušeho Mjezynarodneho zeleneho tydźenja w Berlinje. Tak maja tam nowu halu z čisłom 27. Pod hesłom „Lóšt na wjesnu kónčinu“ zhromadźeja so tam poskićerjo na polu bioekonomije a wuwića wsow. Informacije wo surowiznje drjewo ći w hali wosebje do woči kałaja. Tež dobre digitalne wuhotowanje napadnje. Na centralnym městnje a cyle wočiwidnje pozicioněrowane je stejnišćo zwjazkoweho ministerstwa za zežiwjenje a ratarstwo „Naša wjes ma přichod“. Dešno, dobyćer lońšeho 26. koła, předstaja so z krótkim filmom, w kotrymž je tež serbska rěč słyšeć.