Módro-běli Kulow – Sokoł Ralbicy/Hórki 0:0
Zestawa domjacych: Peschel – B. Korch, Žur, Popjela (46. Böttger), Bulank, Kockert (25. Zablocki), A. Korch, Nicolaides, Kubaink, Bergmann, Maywald (69. Kocor)
zestawa hosći: Schöne – Lešawa, Schultz, Šewc, M. Matka, Lulak, Wałda (89. Budar), Šiman, Bejma, M. Kurjat (69. Nuk), Domaška
Na předposlednim hrajnym dnju běchu so koparjo Sokoła Ralbicy/Hórki z Porchowa z njerozsudnym 1:1 wróćili. Hladajo na tójšto zranjenych a chorych běše to dobyty dypk, tež hdyž steji Porchow na poslednim městnje tabulki. Minjenu sobotu podachu so Sokoljo na dalšu wonkownu partiju z hišće mjenje hrajerjemi. Krótkodobnje wupadnyštaj trenarjej Chrystofej Gloxynej jeho bratr Denny kaž tež Gabriel Kurjat. Tak dyrbješe Bosćij Lulak, kiž hewak pola starych knjezow za bulom honi, wupomhać. Dewiza za hosći tuž rěkaše Kulowčanam porjadnje so wobarać, spytać nulu dźeržeć a z konterami snano sami k wuspěchej dóńć.