Kubłarjo móža na zdokonjane hordźi być

štwórtk, 13. awgusta 2020
artikl hódnoćić
(0 )
Prěni raz w stawiznach Wojerowskeho Powołanskošulskeho centruma „Konrad Zuse“ njemóžachu absolwentam wuswědčenja wosobinsce přepodać. Přiwšěm knježeše dobra nalada, wšako su šulerjo najebać wobmjezowanja korony dla dobre wukony docpěli. Najlěpši z nich bě Vincent Mittelstraß z censurowym přerězkom 1,2.  Foto: Silke Richter Prěni raz w stawiznach Wojerowskeho Powołanskošulskeho centruma „Konrad Zuse“ njemóžachu absolwentam wuswědčenja wosobinsce přepodać. Přiwšěm knježeše dobra nalada, wšako su šulerjo najebać wobmjezowanja korony dla dobre wukony docpěli. Najlěpši z nich bě Vincent Mittelstraß z censurowym přerězkom 1,2. Foto: Silke Richter

Na Zusowym centrumje šulerjow jara derje na žiwjenje přihotuja

We Wojerowskim Powołanskošulskim centrumje „Konrad Zuse“ mějachu lětsa­ njezwučeny pruwowanski čas. Šule­rjo su pak swoje wukubłanje zakónčili a su nětko wosobinsce zrali za powołanske žiwjenje. Poprawom chcyše kubłanišćo nětko w lěću 25. róčnicu wobstaća woswjećić, dyrbješe pak swjedźeń koronapandemije dla wotprajić.

Hižo dlěje hač dwaj lětdźesatkaj je Wo­je­rowski powołanskošulski centrum wobšěrnje nastajeny. Tak maja tam fachowu šulu, powołanski gymnazij, fachowu wyšu­ šulu, powołansku fachowu šulu, powołansku šulu kaž tež powołanske zakładne kubłanske lěto hač k poskitkam přihota na powołanje.

Jedyn z wuknjacych minjenych lět bě Vincent Mittelstraß. Byrnjež pruwowanja w času korony njezwučene byli, njebě wón wulce napjaty. 23lětny młody muž z Lipoja (Leippe) je sej dźeń do pisomnych pruwowanjow šulsku maćiznu hišće raz wobhladał a so intensiwnje z formulemi zaběrał, kaž rozprawja. Zo wón lochko wuknje, pokazuje so tež na jeho wukonach. W skrótšenym wukubłanskim času na překupca za drobnowi­kowanje je wón přerězk 1,2 w šulskim wobłuku swojeho wukubłanja docpěł a bě najlěpši wučomnik lěta.

To, štož młodostni hewak w třoch lětach­ zdokonjeja, je wón w běhu dweju lět zmištrował. K wuspěchej je wězo tež přinošowało, zo so Vincent tam jara derje­ čuješe. Kubłanišćo skići moderne wuknjenske wuměnjenja, dobru šulsku klimu a přećelnych wučerjow. „Powołanskošulski centrum bě za mnje dobry rozsud“, Vincent Mittelstraß wróćo zhladuje. Žiwjenski wotrězk na kubła­nišću je so za njeho zakónčił. Při­wšěm je tróšku zrudny.

W šulskim centrumje sej zakład přichoda zdźěłał

W minjenymaj wukubłanskimaj lětomaj je so za 23lětneho tójšto do směra na powołanske žiwjenje hibało, byrnjež bóle připadnje a z nuzy sem. Šulerjo wšak maja tež praktiske nazhonjenja zběrać a sej za to zawod pytać, štož stajnje­ tak lochko njeje. Vincent je sej krótkodobnje tankownju OIL w Čornym Chołmcu wuzwolił. Zo tónle rozsud je­ho­ powołanske žiwjenje we wulkej měrje wobwliwuje, njeby sej myslił. „Dźěło tam je mi telko wjesela wobradźiło, zo so bórze za to horjach po wukubłanju swójsku tankownju nawjedować“, wón wróćo a doprědka zhladuje.

W Eilenburgu rodźeny móhł sej derje předstajić w regionje wostać a to nic jenič­ce, dokelž je sobustaw Wojerow­skeho wolejbuloweho mustwa. „Woko­lina ma wšitko, štož jako młodostny trjebam a štož je mi wažne“, wón wu­zběhnje. Njedyrbjał-li pak sej powołanske přeće spjelnić móc, chce fleksibelny wostać a sej swój són něhdźe druhdźe zwoprawdźić. Žadyn plan B dźě nima.

Šulsku nawodnicu Kathleen Stephan wuslědk abiturientki Adriany Lachmann tohorunja zwjesela. Wona je na­jebać wužadanja koronapandemije dla přerězk 1,4 docpěła a tak powołanje indu­strijneje překupče jara wuspěšnje zakónčiła. Bórze započnje w Drježdźanach studować. Silke Richter

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND