Zaměrne dźěło na nowej „kótwicy“

wutora, 15. septembera 2020
artikl hódnoćić
(0 )

Miłoraz (SN/BŠe). Nimale 18 měsacow po tym zo bu přesydlenske zrěčenje za wjes Miłoraz podpisane, móža po wotkryću ležownosćow na nowym stejnišću twarić započeć. Přestrjeń je něhdźe 14 hektarow wulka. Minjene dny je přede­wzaće Łužiska energija a milinarnje (LEAG) w starym Miłorazu hižo prěnje chěže spotorhać dało. „Naš zaměr je staru wjes dołhož móžno zachować a při­wšěm w nowym Miłorazu nowu kótwicu wuhotować“, zdźěli manager LEAG za in­frastrukturu Martin Klausch powěsćerni dpa. Po wobzamknjenju Slepjan­skeje gmejny dóstanu tež dróhi znate mjena. Tohorunja zarjaduja na nowym stejnišću dom za zetkawanje, pomnik, kupjel a sportnišćo – poprawom wšo to, štož maja wobydlerjo tež w starym Mi­łorazu.

Kónc awgusta bě Miłoraz wulka tema w medijach. Bagry torhachu prěnje chěže w starej wsy, štož je wjele spřeći­wjenjow wuwabiło. Samo sakski statny minister za energiju, škit klimy, wobswět a ratarstwo Wolfram Günther (Zeleni) do Miłoraza přijědźe, zo by so na městnje wo połoženju wsy wobhonił. Předsyda Domowiny Dawid Statnik bě tohorunja přitomny a wuzběhny, zo njeměli diferency w energijowej politice na do­moródnych wotwaleć. Po pokazkach Miłoražanow bě hižo dlěje jasne, zo ma so wjes zhubić. Nětko su noweho medial­neho zajima dla překwapjeni a zdobom přesłapjeni.

Jasne je, zo chce so wjetšina ludnosće na nowe stejnišćo do Slepoho přesydlić. Dalši z něhdźe 200 wobydlerjow wopřijaceje wsy poćehnje do Trjebina. Někotři pak docyła w gmejnje wostać nochcedźa, byrnjež opciju měli so hišće za Slepo rozsudźić. Twarska přestrjeń je k dispoziciji“, Martin Klausch wuswětla. Tuchwilu je předwidźane, přesydlenje do Slepoho hač do kónca lěta 2024 wotzamknyć. Hižo lětsa nazymu nastanu prěnje fundamenty za nowe domy.

Kaž LEAG zdźěli, je brunica wosebiteho pola Miłoraz na kóždy pad za zastaranje milinarnjow trěbna. Pod wjesku leži něhdźe 145 tonow brunicy, z kotrejž maja Hamorsku milinarnju wobhospodarjeć. Po tuchwilnych planowanjach je wjes na kromje Wochožanskeje brunicoweje jamy poslednja Němskeje, kotruž dyrbja „čorneho złota“ dla wotbagrować. Hač do lěta 2038 ma wudobywanje brunicy w Zwjazku zakónčene być.

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND