Młodych wučomnikow tradicionelnje wuwjazali

wutora, 15. septembera 2020
artikl hódnoćić
(0 )
Elija Žur z Hórkow je zašłe tři lěta w Konječanskej firmje Měrćina Hrjehorja powołanje třěchikryjerja nawuknył. Minjenu sobotu dósta wón nětko swoje wopismo.  Foto: Carmen Schumann Elija Žur z Hórkow je zašłe tři lěta w Konječanskej firmje Měrćina Hrjehorja powołanje třěchikryjerja nawuknył. Minjenu sobotu dósta wón nětko swoje wopismo. Foto: Carmen Schumann

Budyšin (CS/SN). Cyłkownje 87 młodo­st­nych je minjenu sobotu po tři lěta trajacym wukubłanju na pjekarja, rěznika, fachoweho předawarja mjenowaneju wobłukow, mulerja, třěchikryjerja, ćěslu, blidarja, molerja a lakěrarja, frizera abo běrowoweho překupca we wobłuku Budyskeje rjemjeslniskeje komory swoje wuswědčenje dóstało. Wuwjazali su wučomnikow tónkróć w Budyskim Němsko-Serbskim ludowym dźiwadle.

K absolwentam słušeše mjez druhim 20lětny Elija Žur z Hórkow. Nawuknył bě wón rjemjesło třěchikryjerja w Konječanskim předewzaću Měrćina Hrjehorja. Dokelž nimale wšitcy kolegojo mjez sobu serbuja, je so Hórčan tam za čas wukubłanja přewšo derje čuł. Po wuspěšnym zakónčenju budźe dale w zawodźe dźěłać a nima najprjedy raz předwidźane něšto na tym změnić. Młody muž chce w předewzaću nazhonjenja zběrać a so dale kubłać. Třěcha staršiskeho domu dźě chce wot njeho znowa zakryta być. Dźěła na třěše, kotrež běchu za čas jeho dźěćatstwa přewjedli, jeho tehdy tak fascinowachu, zo započa so hižo zahe za rjemjesło třěchikryjerja zajimować. Za powołanje je dobra konstitucija trěbna. Tež wulkeje wysokosće njesměš so bojeć. Na tej kajkosći móže so Elija spušćeć. Rady dźě so w ekstremnych sportowych družinach wuspyta. Hižo sydom lět wukonja sport parkour, při čimž po zdaću z lochkosću po zadźěwkach běha a skaka. Nimo toho wón rady krosnuje, najradšo bjez zawěsćenskeje techniki. „Wěm, hdźe moje hranicy su, a mam swoje ćěło pod kontrolu“, wón praji. Dale Elija Žur rady nuri. To wšak njezadźiwa, wšako jeho nan připódla nurjakow wukubłuje.

Štož powołanske dalekubłanje nastupa, ma 20lětny hižo předstawy. Dokelž jeho předewšěm dźěło ze šćěpjelom zahorja, chce so wón na wudźěłk bóle specializować. Wuheń abo swisle ze šćěpjela, to spožča chěži wosebity wobraz, wón měni.

Mjez 87 młodymi fachowcami su sobotu jědnaćoch wosebje wuznamjenili, dokelž běchu wukubłanje z wukonom derje zmištrowali. Mjez nimi bě tež Rabea Zimmermanec z Radworja, kotraž je w Budyskej firmje Neumeister powołanje blidarki nawuknyła. Wona je w mjenje młodych fachowcow dźakne słowa přednjesła.

Dokelž maja rjemjeslniske powołanja wjelelětnu tradiciju, bě tež wuwjazanje tradicionalne. Młody třěchikryjer Florian Schneider dyrbješe so poklaknyć a swoje hrěchi přiznać, prjedy hač su jeho ze symboliskim klepnjenjom hamora na ramjo wuwjazali.

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND