Najebać problemy z wodu kwalita karpow tež lětsa jara dobra

Rakecy (SN/BŠe). Haty wobhospodarjeć je hladajo na suchotu a mało wody jara wulke wužadanje. Minjenej lěće móžachu hatarjo staw wody hišće někak wurunać, połoženje pak so dale a bóle přiwótřa. „Na někotrych blakach je mjeztym jara ćežko wodźizny wobhospodarjeć“, rozłoži jednaćel krajneho rybar- skeho zwjazka Andreas Stummer minjenu sobotu na zahajenju lětušeje sakskeje karpoweje sezony. Wjele rybow z hatow su tuž hižo nuzowje wułójili, tež Karsten Ringpfeil ze Stróže pola Rakec. Wot dźensnišeho pak wěnuje so wón regularnym žnjam. Horce wjedro wšak runjewon optimalne njeje, ale kaž Stróžan měni, dyrbi so kóždy na to nastajić.

Suchota wujewja hišće dalši problem. Je-li woda w hatach jara niłka, maja so rubježne ptaki, kaž kormorany, čaple abo mórske worjoły, lóšo ryby popadnyć. Straty su dźeń a wjetše a njehodźa so zdźěla hižo wurunać. Woblubowanych rybow, kaž su to šćuki a liny, budźe lětsa skerje mjenje.