Metalotwarska firma Weda za inowatiwny wudźěłk wuznamjenjena

Njebjelčicy (UM/SN). Jako so kónc měrca prěnja žołma koronawirusa wupřestrěwaše, běchu – runje tak kaž wšelake druhe produkty – tež nastroje za desinfek­ciske srědki požadany wudźěłk, kotryž bě wupředaty. Tež Dawid Wjenk je po­dar­mo spytał tajki dóstać. „Tak sej rjeknych: Mamy­ sej sami nastroj zhotowić.“ To je lochko prajene. Tola w padźe Dawida Wjenki běchu wuměnjenja spjelnjene. Wšako je wón rjemjeslniski mišter a jednaćel metalotwarskeje firmy, kotraž ma wšitke trěbne kompetency tajke nastroje zhotowjeć. A tak započa wuwiwanski team Weda metal tzwr ideju šefa zwoprawdźić. „Připrawu měli z dwěmaj do pjeć litrami desinfekciskeho srědka pjelnić móc. Dale měł nastroj bjez wobšěr­neho hladanja wuńć, z mało kontaktom so posłužować hodźeć, lochce posłužujomny być a bjez miliny fungować“, bě předstawa teama. A w Njebjelčicach zasydlene předewzaće je w běhu mało tydźenjow připrawu z mjenom „Think Green“ wuwiło. Nastroj je nimale połdra metra wulki a z drohowocla. Posłužować hodźi so z nohu a pedalom.