Při Slěbornym jězoru su wobšěrne twarske dźěła předwidźane
Bjedrichecy (AK/SN). Hladajo na saněrowanje wodźiznow we łužiskej jězorinje, štož zamołwja Łužiska a srjedźoněmska towaršnosć hórnistwoweho zarjadnistwa (LMBV), wostanje Slěborny jězor jedne z ćežišćow. Wot zymskeho połlěta 2022/2023 budźe přibrjóh pola Bjedrichec ponowjeny. Hač do lěta 2030 dyrbja twarske dźěła zakónčene być, podšmórnje nowinski rěčnik LMBV dr. Uwe Steinhuber. „Saněrowanje ma so předewšěm z jězora sem zwoprawdźić. W tym zwisku je trjeba, techniku na njón dowjezć.“ Za to přihotuja městnosć njedaloko Łazowskeho železniskeho zastanišća. Kaž při Hórnikečanskim jězorje praktikowane ma wona wosebite statiske wuměnjenja spjelnić, za čož natwarja wotpowědnu sćěnu. „Tam móžemy ćežku techniku lóšo do jězora sadźić“, dr. Steinhuber rozłožuje.