Hodźi so Hornja Łužica jako kónčny skład atomowych wotpadkow?

Jednanje za najlěpje hodźace so składźišćo atomowych wotpadkow je zahajene. Sakscy krajni geologojo pak dadźa swojim kolegam Zwjazka katastrofalne wuswědčenje, při čimž tež njenapadne zemjerženje rólu hraje.

Hornja Łužica (UM/SN). 22. apryl 2013 bě za Budyšin a wokolinu cyle wosebity dźeń. Na tymle pomnjećahódnym datumje – bě to póndźela – je so mjenujcy šěsć kilometrow wot města zdalene mjez Słonej Boršću a Bolborcami zemja třasła. Po informacijach internetneho portala volcanodiscovery.com bě to dokładnje w 14.17 hodź. Přiwšěm bě zemjerženje w tajkej hłubokosći, zo njejsmy to na powjerchu pytnyli. Jeničce čućiwe seismologiske instrumenty wědomostnikow su střasenje zemje ze sylnosću 2,3 we hłubokosći dźesać kilometrow zwěsćili.