Bonn (SN/CoR). Kulturne organizacije w Němskej dóstachu minjene sydom lět wjace hač 32 milionow eurow we wobłuku kulturneho spěchowanskeho programa Europskeje unije „Kreatiwna Europa KULTURA“. Dohromady je so 199 němskich organizacijow z 225 projektami ­na programje wobdźěliło. Brošurku, kotruž je běrow z mjenom Creative Europe Desk KULTUR nětko składnostnje zakónčenja spěchowanskeje doby 2014–2020 wudał, předstaja daty ze štyrjoch spěchowanskich wobłukow. Su to europske kooperaciske projekty, literarne přełožowanske projekty, europske syće a europske platformy. W Sakskej spěchowachu dohromady 17 projektow. Mjez druhim su so Gerharta Hauptmannowe dźiwadło Zhorjelc-Žitawa, Drježdźanski centrum za načasne wuměłstwo Ostrale a Europski centrum wuměłstwow Hellerau wuspěšnje wobdźělili. Creative Europe Desk KULTUR je w lětach 2014 do 2020 něhdźe 12 000 telefoniskich poradźowanjow přewjedł. Za nowu spěchowansku dobu wot lětušeho je Europska unija wjace hač dwě miliardźe eurow za program „kreatiwna Europa KULTURA“ přewostajił.