Wobaj zawodaj koncerna Alstom chcetej tramwajki za Berlin twarić
Budyšin/Hennigsdorf (UM/SN). Mjez stejnišćomaj francoskeho koncerna Alstom w Hennigsdorfje sewjernje Berlina a Budyšinje je wo nadawku, twarić nowe tramwajki za stolicu Němskeje, rozkora wudyriła. Předchadnik Alstoma – kanadiske předewzaće Bombardier – je rozsudźił, nadawk cyłkownje 117 jězdźidłow w hódnoće 571 milionow eurow Budyšinej přewostajić. Z tym pak w Heningsdorfskim zawodźe scyła přezjedni njejsu. Tamniša zawodna rada kaž tež lokalni politikarjo braniborskeje kónčiny sej nětko wot Alstoma žadaja, tramwajki w tworni blisko Berlina zhotowjeć směć. Jako hłowny argument mjenuja woni předewšěm bliskosć k zwjazkowej stolicy.
