W ćopłej wodźe předewzaće Chrjebjanska rybjaca tzwr w Čornej Pumpje přez zymu ryby plahuje. Młode karpy a jasotry bórze do normalnych hatow přećahnu. Rybarjo liča lětsa z lěpšimi wuměnjenjemi.

Čorna Pumpa (JoS/SN). W ćopłowódnej plahowarni předewzaća Chrjebjanska rybjaca tzwr na industrijnišću Čorna Pumpa je přez zymu 160 000 karpow a 3 000 jasotrow na šwarne młodźata narostło. Loni w septembrje běchu je jako małe rybički do připrawy sadźili. Karpički běchu jedne lěćo stare, małe jasotry něhdźe pjeć centimetrow wulke. Wone su nětko hač do 50 centimetrow dołhe. Hižo nazymu budu na předań, runje tak karpy. W ćopłej wodźe su ryby jedne plahowanske lěto přeskočili. Ručež wjedro to dowoli, budu ­wone do normalnych hatow přesadźene.

Ćopłowódna plahowarnja w Čornej Pumpje je cyłu zymu bjez problemow dźěłała. Jeno šěre čaple wopokazachu so z wyšiny jako wohrožace za drohotny wobstatk w basenkach. Zo bychu ryby škitali, buchu rubježne ptaki z banćikami ­zešerjene.