Drježdźanska rjemjeslniska komora so w Běłej Wodźe angažuje a podpěruje nowy wobłuk

Sportowu technologiju jako nowy wobłuk­ łužiskeho rjemjesła chcyše Drježdźanska rjemjeslniska komora poprawom 4. oktobra w Běłej Wodźe oficialnje zahajić. Koronapandemije dla pak bu termin přesunjeny. Projekt je naprawa strukturneje změny a ma dźěłowe městna tworić. Nowy wobłuk bu hižo do toho raz předstajeny.

W prěnim wokomiku skutkuje scenerija trochu spodźiwna: Młody muž, kiž ma šmóratko na kóncu dołheho kija připinjene, balansuje je něhdźe meter wysoko nad rjapom konja. Pomałku pohibuje wón komunikaciski nastroj, kiž wšak ma hišće wjele wjac funkcijow. ­„Na te wašnje móžu rjap konja po milimetrach dokładnje skenować“, wuswětla Jonny Fischer, kaž młody muž rěka. Cyle dokładnje wužiwa wón za to program Face­ ID – aplikaciju, kotraž poprawom spóznawanju mjezwočow słuži. To rozłožuje Fischer zajimcam, kotřiž su na předstajenje do Krušowa (Groß Krauscha) w Zhorjelskim wokrjesu přijěli.