Lońše žně buram „škrička nadźije“ byli

Budyšin (SN/BŠe). Ratarjo bědźa so tuchwilu z mnohimi ćežemi a wužadanjemi. Tak maja klimowu změnu zmištrować. Dale starosći jich wupřestrěwaca so afriska swinjaca mrětwa, a naposledk čaka energijowa změna, kotruž chce nowe zwjazkowe knježerstwo bóle forsěrować.

Hladajo na lońše žně pak su ratarjo spokojom, a po słowach prezidenta regionalneho burskeho zwjazka Budyšin-Kamjenc Stefana Triebsa běchu wone kaž „škrička nadźije“. Na spočatku žnjow w lěću drje su burja trochu zludani byli, wšako běchu w zwisku ze spadkami w nalěću wjace wočakowali. Wunoški zorna a rěpika běchu wo něšto mjeńše hač lěto do toho.