Na wčerawšim dnju chlěba su pjekarjo swoje kreacije předstajili
Budyšin (SN/BŠe). Chlěb njesłuša jenož k zakładnemu zežiwjenju. Mjeztym pjekarjo stajnje nowe kreacije wuwiwaja, kotrež su woprawdźite chłóšćenki. Na wčerawšim dnju němskeho chlěba su so wšelake zarjadowanja wotměli, na kotrychž stejachu kreacije rjemjeslnikow w srjedźišću. Jedne tajke bě w twarjenju Budyskeho wokrjesneho rjemjeslnistwa, hdźež předsyda wokrjesneho pjekarskeho zjednoćenstwa Lutz Neumann zajimcow witaše. Akciju na dźeń chlěba stej chorobna kasa IKK a wokrjesne rjemjeslnistwo zhromadnje organizowałoj a na strowe pjekarske wudźěłki skedźbniłoj. Tež wosebity chlěb z mjenom „ikk“ (ingwer, zorno, skorpawa) tam ludźom poskićachu.