Łužiske campingowanišća dale woblubowane
Zły Komorow/Budyšin/Niža Wjes (SN/JBo). Mnohe jězory z móžnosćemi campingowanja kaž tež poskitki k wočerstwjenju a za aktiwny dowol wabja tójšto ludźi swój dowol we łužiskim regionje přežiwić. Tež lětsa su ličby nastupajo wućeženje campingowanišćow dale wysoke, kaž nam wjacori wobhospodarjo na naprašowanje zdźělichu.
„Cyłkownje móžemy pozitiwnu mjezybilancu za dotalne lěto sćahnyć. Naše campingownišća při Złokomorowskim jězoru – swójbny park, komfort camping a přistawny camp – su wulce woblubowane a chětro prašane. Wućeženje je lětsa wyše hač do korony w lěće 2019. To móhło na tym zaležeć, zo dyrbjachu ludźo 2020 a 2021 prosće dowol w Němskej činić a to lětsa zdźěla dale činja. Złokomorowski jězor a Łužiska jězorina běštej hižo do pandemije jara woblubowanej mjez čěskimi hosćimi. W lětomaj 2020 a 2021 mějachmy jenož mało mjezynarodnych hosći. Wokomiknje pak dožiwjamy zaso přirost dowolnikow z Čěskeje“, zdźěli referentka Zaměroweho zwjazka Łužiska jězorina Braniborska za rozšěrjenje a social media Julia Kussatz.
