Kónc měsaca faza wužiwanja jězdźenki za dźewjeć eurow wuběži
Budyšin (SN/bš/JBo). 92 dnjow – wot junija hač do awgusta – běše móžno za dohromady 27 eurow ze zjawnymi wobchadnymi srědkami po Łužicy, ale tež po cyłej Němskej jězdźić. Zwjazkowe knježerstwo je jězdźenku za dźewjeć eurow we wobłuku prěnjeho wolóženskeho paketa zawjedło, zo bychu so nastupajo stupace energijowe płaćizny wudawki za wšědne dojězdźowanje wobydlerjow w zjawnym bliskowobchadźe znižili. Z tym zwjazany nawal ludźi je wobchadne zawody na hranicy kapacitow přinjesł.
