Zelena liga samowólne plany wobnowjomneje energije wotpokazuje
Choćebuz/Berlin (SN/MiP). Składnostnje zawčerawšeho słyšenja wo naćisku „zakonja k spěšnišemu wutwarej wobnowjomnych energijow we wobłuku městotwarskeho prawa“ w zwjazkowym sejmje žada sej organizacija za škit wobswěta Zelena liga, zo bychu wobydlerstwo do procesa připokazanja wětrnikowych a solarnych płoninow w brunicowych kónčinach bóle zapřijeli. Dale sej wona wjetšu transparencu planowanskich kriterijow přeje.
Nowy zakoń (paragraf 249b městotwarskeho prawa) zmóžnja zwjazkowym krajam samowólnje, zwonka wšěch dotalnych planowanskich procesow, wětrnikowe a solarne přestrjenje wupokazać. Z tym zasahnje wón do škita komunalneje planowanskeje kompetency we wustawje, kaž tež do regionalneje planowanskeje zamołwitosće nastupajo energiju z wětřika.