Twarstwo trjeba šćerk, zwada wo jeho wudobywanje pak eskalěruje

Ottendorf-Okrilla (SN/mb). Christin Furtenbacher, předsydka Zelenych w Sakskej, sej žadaše, zo njech policisća „maksimalnje deeskalěrujo jednaja“ a so wo to staraja, zo njebudźe nichtó při zrumowanju protestneho campa we Łužničanskej holi zranjeny. Dźens rano je krajnoradny zarjad Budyšin přepruwował, hač su protestowacy jeho wukaz „za zhromadźiznu w formje lěsneho campa“ dodźerželi. Po tym je „zhromadźiznu“ hamtsce rozpušćił, statny zawod „Sakski lěs“ je pobyt w lěsu zakazał. Kaž prawiznik aktiwistow, Ingo Blechschmidt, Serbskim Nowinam hižo do toho praješe, postorkuje so zarjad na domčkach na štomach. Někak tysac policistow přihotuje z wottwarom barikadow zrumowanje campa, kotrež móhło pjeć dnjow trać. Wobsadźerjo lěsa su „Techniski pomocny skutk“ (THW) kritizowali, zo njeje neutralna organizacija, ale kaž w Lützeraće policiji poboku.