BUND ma reaktiwizowanje milinarnjoweju blokow w Janšojcach za zbytne

Budyšin (SN/MiP). Najebać energijowu krizu, kotruž je wójna Ruskeje přećiwo Ukrainje wuskutkowała, je milinarnja w Janšojcach snadnje wućežena. Wobswětowy zwjazk BUND Braniborska samo sudźi, zo móhli tři wot šěsć jeje blokow wupinyć. „Tole z datow internetneje słužby energy-charts Frauenhoferskeho instituta jasnje wuchadźa“, pisaše zwjazk njedawno w nowinskej zdźělence.

„Znajmjeńša dwaj blokaj milinarnje byštej dyrbjałoj blisko połneho wućeženja dźěłać, hdyž by wo to šło, zo matej zastaranje z energiju sobu zaručeć. A to by był wukon blisko 3 000 megawattow. Tomu pak loni ženje tak njebě, kaž sej z datow wučitamy,“ jednaćel braniborskeho BUND, Axel Kruschat, na naše naprašowanje konkretizuje. Město toho produkowaše milinarnja wot oktobra do decembra 2022 jenož na něšto dnjach wjace hač 2 000 megawattow. Rěčnik LEAG, Thoralf Schirmer, kotrehož smy so telefonisce prašeli, nochcyše so k faktam BUNDa wuprajić. Za njeho su to „twjerdźenja“ a wón jenož na pisomne prašenja wotmołwja.