W parku za swójby Kóšyna je 13 Ukrainjanow přistajenych
Z Mariju je so wšitko započało. „Chcu tu dźěłać“, je Ukrainjanka na swój smartphone napisała. Z tym steješe w nowembru 2023 před zarjadnistwom zaměroweho zwjazka Łužiska jězorina Braniborska w parku za swójby Kóšyna (Großkoschen) při Złokomorowskim jězoru.
„Pytachmy za nju rozrisanje, přetož zwjazk trjebaše nuznje sobudźěłaćerjow w domjacnosći“, powěda předstejićer zwjazka Detlev Wurzler. „Tehdy běštej wobłukaj domjacnosć a hladanje zelenišćow hišće dźělenej. Mjez sobudźěłaćerjemi bě distanca. Jedni hladachu naše přemysłowe připrawy, tamni zjawne wobłuki. Sym so wot spočatka wo to prócował, wšitkich sobudźěłaćerjow zwjazka jako cyłk hromadu zwjesć. Dalše wužadanje bě, sobudźěłaćerjow po móžnosći cyłe lěto zaběrać. Smy minjene tři lěta wjac hač 40 sezonowych zrěčenjow na cyłolětne zrěčenja přetworili.“ Marija słušeše k prěnim ukrainskim sobudźěłaćerjam w parku za swójby. Dźensa dźěła za komunalny zaměrowy zwjazk 44 wot 130 sobudźěłaćerjow na polu domjacnosće. Z toho je 13 Ukrainjanow.
