Měšćanostka Christine Herntier (njestronjanka) widźi to tak: „Grodk wobara so stracham z prawicarskoekstremneje strony ,III. puć‘“. Mjeztym jej AfD z wotwolenjom hrozy.

Grodk (AK/SN). Wo połoženju w měsće, kotrež so „parlička Łužicy“ mjenuje, wuradźowaše měšćanostka nětko ze zastupjerjemi šulskeho zarjada, wustawoškita, mobilneho poradźowanskeho teama Braniborskeje a koordinaciskeho běrowa „Tolerantna Braniborska“ krajneho knježerstwa. Přičina je nawal prawicarskich móranjow, přećiwowustawowych symbolow, překrasnjenje Adolfa Hitlera wo­srjedź města kaž tež wobškodźenje wěcow­ a zanjerodźenje w měsće kaž ženje­ dotal. Na to pokaza tež reportaža rbb „Młodźi. Naprawo. Radikalnje – neonacije we Łužicy“. Herntier je so hižo do toho w hamtskim łopjenje tuteje temy dla na zjawnosć wobroćiła (SN rozprawjachu).

W přinošku so měšćanostka tež prašeše: „Kak móže być, zo přińdu wučerjo a šulerjo z wobeju wyšeju šulow ke mni, połni złobow a stracha, a mi wo situacijach rozprawjeja, kotrež njejsym za móžne měła? Kak móže być, zo mje runočasnje wo to proša, zo wo tym njerozprawjam?“