Zhorjelc/Chrósćicy (SN/mb). Astrocentrum Łužica (DZA) drje wětrniki njewotpokazuje, ale trjeba za swoje podzemske detektory za wuslědźenje grawitaciskich žołmow ze swětnišća „wosebity seismiski měr“, kaž rěčnik DZA Stephan Witschas na naprašowanje Serbskich Nowin (SN) wobkrući. Tón měr su we łužiskim zornowcu nadešli. Tohodla su najprjedy w Konjecach a potom na dalšich sydom blakach we wokolinje točić započeli, zo bychu idealne městno za přistup do planowaneho podzemskeho labora namakali. Nimo toho namjetuja „škitne pasmo 15 kilometrow dokoławokoło centralneho dypka“ w geografiskim třiróžku, kiž je domizna katolskich Serbow.

To woznamjenja, zo nimaja so „we wokolinje přichodneho ruma slědźenja žane nowe płoniny za prioritne wužiwanje energije z wětřika wupokazać.“ Zwonka pasma chcedźa „wuske fachowe wothłosowanje“. Wo tym dawno z regionalnym planowanskim zwjazkom jednaja.