Wědomostnicy přeprošuja zaso ludnosć regiona na dialog

Konjecy/Wojerecy (SN/mb). Mike Kretlow je stoty sobudźěłaćer Astrocentruma Łužica (DZA), najwjetšeho předewzaća změny strukturow w Hornjej Łužicy. Rodźeny Wiesbadenčan je jako astrofyzikar naposledk w južnej Španiskej dźěłał. Wot njedawna so we Łužicy technologiskemu wuwiću při wuslědźenju swětnišća wěnuje. Jako jeho załoženski direktor astrocentruma Günther Hasinger w Zhorjelskej centrali předstaji, běše poselstwo jasne: Natwar centruma, w kotrymž změje tysac ludźi dźěło, mjez nimi třista wědomostnikow, běži po planje. Přichodnu wutoru popołdnju chcedźa wot 17 hodź. w Konjecach při domje towarstwow zjawnosć zaso wo běžnym dźěle informować (zajimcy njech so přizjewja: ). Trójce su tam hižo grilowali, Hasinger bě so ­samo jako spěwar profilował.