Dźeń a wjace politikarjow žada sej reformu jězbneho wukubłanja

Berlin (SN/CeK). Štóž chce dźensa jězbnu dowolnosć dóstać, trjeba wulku móšnju a wjele sćerpnosće. Po informacijach ADAC płaćitej teorija a praksa cyłkownje husto wjace hač 3 500 eurow. Přidatnje dyrbja jězbni šulerjo měsacy dołho na pruwowanske terminy čakać. W Berlinje, tak trochuja, tuchwilu něhdźe 20 000 terminow pobrachuje. Wosebje na kraju mnozy młodostni hižo zahe jězbnu šulu za moped wopytaja, zo bychu mobilni byli – za jězbnu dowolnosć awta pak dyrbja so pozdźišo znowa do jězbneje šule podać. Tak wudawaja młodostni na kraju spěšnje wjace hač 4000 eurow za swoju mobilitu.

Za zapósłanca CDU w zwjazkowym sejmje Floriana Müllera je to staw, kotryž chce spěšnje změnić. „Kóšty rostu ludźom přez hłowy“, wón praji. Zhromadnje ze swojej frakciju je tuž próstwu zwjazkowemu sejmej zapodał. Titul próstwy je: „Zo njeby so mobilita z luksusom stała – za jězbnu šulu, kiž je zapłaćomna“.