Dobre wunoški w sakskich ratarskich zawodach maja tež njedobry wuskutk

Róžant/Zdźěr (SN/MiP). Swoju lětušu krajnu domchowanku je Sakska hižo před třomi njedźelemi we Wojerecach woswjećiła. Swoje lětuše žně wšak burja w našich kónčinach hišće cyle zakónčili njejsu – poslednje běrny, rěpu a kukuricu maja hišće domchować.

Hižo spočatk zašłeho měsaca je Torsten Krawczyk, prezident Sakskeho krajneho burskeho zwjazka, w nowinskej zdźělence bilancował, zo su lětuše žně žita najebać mnohe spadki w žnjenskim času­ „wo wjele lěpše, hač smy to wočakowali“. Žito je w sakskich ratarskich zawodach najbóle plahowana kultura. Po datach statistiskeho krajneho zarjada su sakscy ratarjo lětsa nimale 2,65 milionow tonow žita nažnjeli, to je 12,4 procenty wjac hač loni. Tež wunoški žnjow rěpika leža lětsa z 3,42 tonami na hektar nad přerězkom.