Krajna direkcija Sakska wuwzaćnje tež třělenje zwěrjatow dowoliła

Budyšin (SN/BŠe). Stajnje zaso skedźbnjeja hatarjo na to, zo bobry wulke škody zawinuja. Tež na zahajenju łužiskich ­rybowych tydźenjow wo tym wuradźowachu. Potrjecheni žadaja sej reakciju a podpěru ze stron politiki. Nětko je krajna direkcija Sakska hladajo na škody pola hatarstwa w Chrjebi reagowała. Při předewzaću w biosferowym rezerwaće Hornjołužiska hola a haty smědźa prěni raz bobry wottřěleć. To steji w zdźělence, ­kotruž su ­sakske přirodne zwjazki a organizacije NABU, BUND, Přirodoškitny zwjazk a Zelena liga wozjewili. Tole pak je jenož poslednja opcija. Ju smědźa jenož nałožować, jelizo njejsu žane dalše naprawy wuspěšne. Prěnjorjadnje přizwoli direkcija přesydlenju bobrow, kotrež škody w hatarstwje zawinuja. Do Francoskeje chcedźa bobry přesydlić. Hakle hdyž njemóža žiwjenja zwěrjatow hižo dopokazujomnje wuchować, dowoli krajna direkcija morjenje. Institucija pak tuchwilu z toho njewuchadźa, zo budźe poslednja kročel – třělenje – trěbna.