LEAG wuhlo w Braniborskej bórze wjac njetrjeba – zwada wo sakskej jamje

Slepo/Choćebuz (SN/mb). Doba wudobywanja brunicy drje so nachila, tuchwilu pak so hišće husto na powětr wuskutkuje: App za wjedro pokazowaše zašłe dny špatnu kwalitu powětra. Na tym je „mróčel wuhla z wuchoda“ wina, kaž Drježdźanska bulwarna nowina pisaše. Žórło emisijow su nimo wuhlowych milinarnjow w Pólskej a Čěskej domjacnosće, kotrež z wuhlom tepja. Za třećinu smy sami zamołwići, na přikład hdyž doma kamin wužiwamy. Samsny čas je koncern LEAG z rozsudom, wudobywanje brunicy w jamje Wjelcej-juh 2030 – a z tym tři lěta zašo hač planowane – zakónčić, nowu horcu diskusiju wubudźił.