Nic jenož zabawne, ale zdobom tež powučne wulěty bě Zwjazk serbskich rjemjeslnikow a předewzaćelow (ZSRP) loni za swojich čłonow zarjadował. Tutu tradiciju towarstwo lětsa dale wjedźe.

Budyšin (SN/MiP). Swoju prěnju ekskursiju su serbscy rjemjeslnicy a předewzaćeljo loni hnydom spočatk januara přewjedli. Wědomostny sobudźěłaćer Drježdźanskeje Techniskeje uniwersity Roman Kola je wobdźělnikow po Instituće za techniku agrarnych systemow wodźił. „Zo je to w našej maćeršćinje činił, je nas wosebje zwjeseliło“, wuzběhnje předsydka ZSRP Monika Cyžowa w rozmołwje ze Serbskimi Nowinami.

Tež kolesowanska tura je kruty lětny termin w protyčce ZSRP. W juniju běše cil Delnja Łužica. Něhdźe 35 wulětnikow wopyta mjez druhim swójbny ratarski bio-zawod čłonki ZSRP Anici Gullasch w Bobowje (Babow), wjesnym dźělu gmejny Gołkojcy (Kolkwitz). „Mnohostronske ratarjenje po wašnju prjedawšich burow běše za nas zajimawe“, powěda Cyžowa. Na swojich polach plahuja Gullaschecy nimo žita mjez druhim hejduš a mak, ale tež picu za swoje bio-husy, kotrež na statoku předźěłuja.