Nowy turistiski zwjazk Hornja Łužica we wustawkach serbske aspekty nima
Budyšin (SN/MiP). Dohromady 32 čłonow nowemu turistiskemu zwjazkej Hornja Łužica (TVO) přisłuša, kotryž su wčera w Budyskim hotelu Best Western załožili. Mjez nimi su teritorialne turistiske zjednoćenstwa (TGG), komuny, předewzaća a dalši turistiscy partnerojo w Budyskim a Zhorjelskim wokrjesu. Tež Domowina, Industrijna a wikowanska komora (IHK) abo Němski zwjazk hotelow a hosćencow (DEHOGA) su čłonojo zwjazka. Jako předsydu wuzwolichu Budyskeho krajneho radu Udo Witschasa, jako městopředsydu Zhorjelskeho krajneho radu dr. Stephana Meyera (wobaj CDU) a jako druheho předsydu Žitawskeho wyšeho měšćanostu Thomasa Zenkera (njestronjan). „Dalši čłonojo su w nowym zwjazku rady witani“, wuzběhny Witschas na nowinarskim terminje po njezjawnym dźělu zarjadowanja. Pozicija jednaćela zwjazka hišće wobsadźena njeje. Ju chcedźa bórze wupisać.
