Łužiska a srjedźoněmska towaršnosć hórnistwoweho zarjadnistwa (LMB) je minjeny tydźeń připowědźiła, zo wot 29. junija zwjazk z cyłkownje pjeć jězorami oficialnje wotewru.
Rań (AK/SN). Rjećaz pjeć zwisowacych jězorow saha wot 29. junija potom wot Złokomorowskeho přez Lejnjanski, Parcowski a Sedlišćanski hač do Rańskeho jězora. „Tole je měznik w stawiznach łužiskeje jězoriny. Hižo 30 lět na tym dźěłamy.“ To wuzběhny jednaćelka 2012 załoženeho kraje přesahowaceho turistiskeho zwjazka Łužiska jězorina Kathrin Winkler minjenu srjedu na lětnej rozmołwje z nowinarjemi w Ranju. „Znajomosć marki Łužiska jězorina přiběra. Tež atraktiwita za turizm z čołmami so polěpši. Předewšěm nadźijamy so hospodarskich a turistisko-kulturnych impulsow a stupaceho naprašowanja inwestorow.“
