Slepo (SN/MiR). Financowanje strukturneje změny je hač do lěta 2038 jasne. Mjeztym je 75 procentow wšitkich pjenjez za Hornju Łužicu wuplanowanych abo hižo přetrjebanych. W prěnim rjedźe maja so wone za tworjenje nowych dźěłowych městnow wužiwać. To pak so z wida potrjecheneho wuhloweho regiona dosć njestanje. Slepjanski wjesnjanosta Jörg Funda wčera na Facebooku zwu­razni: „Potwjerdźu, zo dyrbi strukturna změna so wosebje tam radźić, hdźež so wona wotměwa. To rěka w rewěrje. Při wšitkich wuspěchach druhdźe, to pak tudy (hišće) njewidźu. Moje žadanje tuž na wšitkich zamołwitych w tutym procesu je nětko kedźbnosć a aktiwity cyle zaměrnje na městnosće wokoło milinarnje a wuhlowych jamow wusměrić.“ W digitalnych medijach je wužiwanje strukturnych pjenjez tema diskusije. Tak pišu, zo zwostanu za regiony, kotrež to najbóle potrjechi, hišće 25 procentow. Druzy dwěluja, zo so politikarjo na wuhlowy region koncentruja. Samo je kritika słyšeć, zo maja wšitcy něšto z pjenjez, nic pak wuhlowy region. Tež kluč rozdźělowanja pjenjez njeje jasny.