Što ludźi, předewzaća a zwjazki w regionje zaběra? W čim widźa šansy, što jich wužaduje a kak móhła jich politika podpěrować? Tutym prašenjam wěnuje so sakski ratarski minister Georg-Ludwig von Breitenbuch (CDU) na swojej „Turje po kraju“. Wčera bě wón w Budyskim wokrjesu po puću.

Rakecy/Mały Holešow/Chrósćicy (SN/CeK/MiP). W biosferowym rezerwaće Hornjołužiska hola a haty wopyta ratarski minister Ringpfeilec hatarski zawod w Rakecach. W zawodźe, kiž słuša k pjeć najwjetšim hatarstwam w Sakskej, plahuja we wjac hač 50 hatach předewšěm karpy. Sakska je po Bayerskej jedna z najwažnišich plahowanskich kónčinow karpow w Němskej. Wot něhdźe 100 tonow rybow zwostanje pak jenož něhdźe pjeć procentow w regionje, dokelž regionalni kupcy sami tajke mnóstwo woteběrać njemóža. Wjetši dźěl dodawaja tohodla do druhich zwjazkowych krajow, kaž tež do Pólskeje abo Čěskeje. Problem hatarjow su nimo bobrow tež kormorany, kotrež wšědnje něhdźe poł kilograma ryby zežeru a z tym wunoški zniža.