Jenož měsac do swojich 91. narodnin je Rolf Dvoracek minjeny tydźeń, 5. měrca, zemrěł. Hišće hač do 12. apryla, jeho narodnin, móža wopytowarjo w Budyskim měšćanskim muzeju poslednju wustajeńcu wuznamneho fotografa a žurnalista wobdźiwać. Wona wobswětla wuměłsku stronu čłowjeka, kotryž bě předewšěm wuwiće swojeje hornjołužiskeje domizny z Budyšinom jako srjedźišćo dokumentował.
Lětdźesatki je Dvoracek jako nowinski reporter za aktualne rozprawnistwo po puću był a tež Serbske Nowiny a do toho Nowa doba su z jeho dźěła čerpali.
