Chrósćicy (SN/MiP). Čłonojo wobydlerskeje iniciatiwy přećiwo planowanymaj wětrnikomaj mjez Chrósćicami a Hórkami su so wčera wječor na posedźenju Chróšćanskeje gmejnskeje rady wobdźělili, zo bychu so předstajili a wotewrjene prašenja rozjimali.

Skupina podšmórny: Městnosć wětrnikow potrjechi wjele wjeskow, mjenujcy Worklecy, Chrósćicy, Hórki a Kozarcy. To rěka: Mnozy wobydlerjo změja njerjany napohlad na wjac hač 200 metrow wysokej připrawje. Runje tak změja we wěstych časach dnja hibace so sćiny rotorow w swojich stwach. „Tež infra-zwuk přez pohib křidłow je problem, kotryž čłowjeka poćežuje. Wo tym stej nam Chrósćance rozprawjałoj, kotrejž blisko wětrnikow na směr Zejicy bydlitej“, naspomni čłon iniciatiwy Krystof Šołta w rozmołwje z SN. Wón doda: „Smy nimo toho zwěsćili, zo so prawnisce předpisanych 1 000 metrow wotstawka wětrnika k sydlišću w padźe wjeski Kozarc njedodźerža“.