Jana Štillerová, wučerka­ na Serbskim gymnaziju w Budyšinje, bu minjenu srjedu w Praze z pedagogiskim mytom Doma mjezynarodneho zhromadneho dźěła wuznamjenjena.

Praha (SN/LuNo). Dom mjezynarodneho zhromadneho dźěła je čěskemu šulskemu ministerstwu přirjadowany. K jeho nadawkam słuša, čěskich studowacych při studiju we wukraju a wukrajnych studentow w Čěskej podpěrać a jim pomhać. Mjez druhim organizuje dom w Čěskej program Erasmus+ a syć wučerjow čěšćiny za čěskich krajanow we wukraju. Wot lěta 2003 čěšćinu tež we Łužicy wuwučuja, štož je reakcija čěskeho stata na Chróšćan zběžk a forma mjezynarodneje podpěry serbskeho kubłanja. Wot lěta 2004 hač donětka su so w Serbach štyrjo wučerjo na tym wobdźělili: Jana Štillerová, Pavel Šlechta, Jan Breindl a Jiří Jonák, kiž aktualnje w Serbach skutkuje.