Worklecy (SN). Wolejbulisća Serbskeje wyšeje šule „Michał Hórnik“ z Worklec su so před tydźenjomaj wuspěšnje na finalu na krajnej runinje wobdźělili. Jako regionalni dobyćerjo Budyskeho wokrjesa wojowachu w Drježdźanach wo tiket za finale na zwjazkowej runinje a to z wuspěchom. Spočatk meje smědźa so Worklečanscy šulerjo w Berlinje z šulemi z cyłeje Němskeje měrić. Rozsud pak spočatnje hišće jasnje njebě, dokelž su hrajerjo mustwa wokoło sportoweju wučerjow Štefana Wjeńki a Křesćana Bejmaka we wotchadnym lětniku a runje w samsnym času pruwowanja w němčinje, serbšćinje a matematice pisaja. Šulske wjednistwo pak je pytnyło, z kelko zahoritosću a zapalom šulerjo swój sport wukonjeja. Tuž so ze sakskim kultusowym ministerstwom do zwiska staji, zo by so rozrisanje namakało. Tajkale šansa dźě skići so šulerjam jenož jónu w žiwjenju, tuž nochcedźa jim tute wjeselo wzać.