Kamjenc (SN/jp). Studentam a slědźacym na polu technologije lětanja je Drježdźanska Techniska uniwersita (TUD) wčera w hangarje Kamjenskeho lětanišća nowu wunamakanku předstajiła. Je to slědźenske lětadło z mjenom „FoFlu“. Po słowach prof. Maika Gude je wone „do přichoda sahacy technologiski měznik, kotryž zaruča slědźenje uniwersity na europskim niwowje“. Puć hač k realizaciji běše dołhi, w běhu dohromady wosom lět pak su Drježdźanscy studenća jónkrótne nazhonjena zběrali, profesor znazorni.

Slědźenske lětadło ma dwaj motoraj, lětać pak móže wone tež z jednym. Drježdźanscy slědźerjo chcedźa inowatiwne, njefosilne ćěridła za nje wuwić, kiž móža w jednym z dweju motorow wuspytać. Nowa mašina zwjazuje technologisku inowaciju lětarstwa z ener­gijowej změnu a regionalnej transformaciju w Sakskej. Kóšty za lětadło wu­činjeja něhdźe tři miliony eurow. Projekt spěchuje Drježdźanska TU ze srědkami Europskeje unije a Swobodneho stata Sakskeje w programje JTF InfraProNet z dohromady 4,6 milionami eurow.­