Radwor (SN/MiP). Hižo wjele lět so Budyski Technologiski a załožićelski centrum (TGZ) we wobłuku inowatiwneho a naslědneho zastaranja z energiju angažuje. Prawidłownje zarjaduje TGZ w tutym zwisku Budyski energijowy forum, na kotrymž předstajeja fachowcy zastupjerjam komunow a zajimowanym wobydlerjam najnowše wuwića a praktiske přikłady na tutym polu. Nic w Budyšinje, ale w Radworskim hosćencu Meja witaše jednaćel TGZ Michael Paduch wčera něhdźe 50 hosći, mjez druhim Budyskeho wyšeho měšćanostu Karstena Vogta (CDU).