Serbšćinu lěto a bóle widźomnu a słyšomnu sčinić je zaměr Myta za hospodarstwo, kotrež Domowina wot lońšeho spožča. Druhi raz wona nětko namołwja, so požadać resp. kandidatow namjetować.

Budyšin (SN/jp). Po tym zo je zwjazkowe předsydstwo zestawu mytowanskeho wuběrka Domowiny za spožčenje „Myta za hospodarstwo“ znowa postajiło, je so gremij wčera prěni raz schadźował. Na tutym zeńdźenju su termin za zapodaće namjetow a požadanjow wobzamknyli. Čłonojo dojednachu so na 31. awgust 2026 jako posledni termin. Sydom wosobow we wuběrku wo tym wuradźuje, kotry zawod so mytuje. Ze serbskim hospodarskim mytom wuznamjenja předewzaća a posłužbarjow, kotřiž so wosebje za zachowanje a spěchowanje serbskeje rěče zasadźuja. Při tym wobkedźbuje jury widźomnosć serbšćiny w zawodźe, regionalne wudźěłki a angažement za serbsku identitu.

Prěni raz bu myto loni spožčene. Domowina­ wuznamjeni towaršnosć LARO­-Handels GmbH & Co. KG w Njeswačidle za tamniše nakupowanišćo a konsum Martina Grunewalda w Janšojcach. Lawreataj dóstaštaj wopismo, tysac eurow jako wu­znamjenjenje a plaketu.