Chrósćicy (SN/MiP). Nic jenož Serbske Nowiny su wo wětrniku na polu mjez Chrósćicami a Zejicami rozprawjeli, kotryž běše so póndźelu krótko po połnocy palił. Wosebje w zwisku z podhladom zapalerstwa su so spočatk tydźenja mnohe zdźělenki wo tym jewili, mjez druhim w Sakskich Nowinach abo na cyłoněmskim powěsćowym online-portalu Tag24.

Póndźelu je nam mějićel pola, Chróšćanski bur Roman Wjesela na naprašowanje zdźělił, zo falowaše zamk durjow do wěže wětrnika. Runje tak kaž wohnjowi wobornicy a policija je wón w nocy bjezposrědnje po zawuću sireny na městnje był. Zdobom pak wón na to skedźbnja, „zo dotal wěste njeje, štó je zamk wotstronił“ a zo móhł tež elektriski defekt za woheń zamołwity być. Za jeho woprawdźitej přičinu zastojnicy Kamjenskeho policajskeho rewěra tuchwilu slědźa. Nimo pobrachowaceho zamka pak njejsu dotal slědy zwěsćili, kiž bychu na zapalerstwo pokazowali. To zdźělichu Sakske Nowiny zawčerawšim w swojej rozprawje. Nažel wčera nikoho ze zamołwitych policije dosćahnyli njejsmy.