Tež serbscy burja su so wot wulkowikow „agra“ inspirować dali

Lipsk. (SN/jp). Hižo wot lěta 1952 přewjeduja so wulkowiki „agra“ za ratarstwo, lěsnistwo kaž tež za plahowarjow. Lětsa wotměchu so 19. raz a to pod hesłom „Z pochada rosće přichod“. 814 wustajerjow pokaza wot minjeneho štwórtka na Lipšćanskej wulkowikowanskej ležownosći, kak sylnje ratarstwo wot techniskeho dalewuwića a nowych idejow wotwisuje. Chróšćan Jan Wjesela, załožer swójbneho ratarskeho zawoda, kotryž bě w lěće 2022 swojemu synej Romanej přepodał, ma za „wažne, zo sej přehlad stworiš a druhi wid wotwonka dóstanješ.“ Wšako sy jako předewzaćel wšědny dźeń prěnjotnje z tym zaběrany, „zo kara běži“. Ze štyrjomi sobudźěłaćerjemi zawoda staj wonaj runja wjele druhim buram z Łužicy zašły štwórtk na „agra“ pobyłoj.

Prezident Saksko-Anhaltskeho Zwjazka burow, Olaf Feuerborn, kotryž běše z hosćom wikow, widźi to takle: „Tu njemóžemy inowacije jenož widźeć, ale je tež přimnyć: moderne mašiny, digitalne nałožowanja a praktiske rozrisanja, kotrež zawodam wšědny dźeń wolóžeja a při tym produkciju polěpšuja.“