Łužiska jězorina hotuje so na wjeršk: Pjeć jězorow so ze zahajenjom lětušeje dowoloweje sezony kónc junija zwjaza. Tole je hladajo na wuwiće jězoriny wažny měznik.

Bjezdowy (AK/SN). Wot 29. junija změje Łužiska jězorina nastupajo turistiske a hospodarske wuwiće nowu kwalitu. Potom budźe mjenujcy móžno, so z pławnymi zwiskami po pjeć jězorach pohibować. „To je historiski měznik a změje wuskutki na dołhodobny rozrost“, podšmórny krajny rada Budyskeho wokrjesa Udo Witschas (CDU), kotryž je zdobom městopředsyda turistiskeho zwjazka Łužiska jězorina, wčera w Bjezdowach. „Na kóncu twarskich dźěłow budźemy 14 000 hektarow wodoweje přestrjenje wužiwać móc. Tuchwilu je jich hižo 5 300 hektarow.“ Rjećaz zwjazuje Złokomorowski jězor z Lejnjanskim jězorom, Parcowskim jězorom, Sedličanskim jězorom a Rańskim jězorom. Jeli so to poradźi, ma tam wot lěta 2029 pasažěrska łódź jězdźić. Zaměrowy zwjazk Łužiska jězorina Braniborskeje chce za to poskićerja namakać.