Drježdźany (SN). Zwjazk pasažěrow ,,Pro Bahn“ dołhotrajace problemy pola Trilexa we wuchodnej Sakskej kritizuje. Falowacych jězdźidłow dla krótkodobnje wjele ćahow wupadnje abo su přepjelnjene. Potrjechene su wosebje kónčiny mjez Drježdźanami, Biskopicami, Zhorjelcom a Žitawu. Wobhospodar Trilexa poda, zo techniskich škodow abo reparaturow dla tučasnje wjacore zwiski wupadnu. Zawodej faluja rezerwy, zo móhł stabilnje hospodarić. Zwjazk Pro Bahn žada sej spěšne rozrisanje problema, při čimž je za komunikaciju z předewzaćelom Trilex wotewrjeny. Po měnjenju zwjazka pasažěrow dyrbja so skóncowane ćahi běžnje narunać, zo by so pasažěram dale jednory transport zmóžnił. Tež starše jězdźidła abo dwuposchodowe wozy z dieselowej lokomotiwu so po słowach Pro Bahn jako přechodne narunanje hodźa. Nimo toho žadaja sej kruty nuzowy plan zwiskow. Wobmjezowany, ale spušćomny jězbny plan pasažěrojo nuznje trjebaja. Dołhodobnje sej Pro Bahn wjace rezerwowych jězdźidłow a wutwar železniskich čarow na wuchodźe Sakskeje žada.