W Radworskej gmejnje planuja dźělenje energije

Radwor (SN/jp/BŠe). Energijowe drustwo „Witaj – lubujemy energiju“ přeprošuje štwórtk, 1. oktobra, we 18 hodź. na zhromadźiznu, kotrejež tema budźe system energije w Radworju. W hosćencu „Meja“ chcedźa wobydlerjam a dalšim zajimcam koncept z mjenom „Energiesharing Radwor“ předstajić. Jendźelske zapřijeće steji za dźělenje energije. Z tym je měnjene, zo móža wobydlerjo mjez sobu z milinu wikować. Štóž ma přemało miliny w swojim składźe, móže susodej energiju wotkupić. Tale móžnosć dźělenja energije w Němskej hižo wot 1. junija tohole lěta wobsteji. Tola tuchwilu so dźělena milina kaž normalna milina w syći wobhladuje. Z tym so płaćizna miliny njezniži.

System dźělenja energije hižo dawno w Awstriskej z wuspěchom nałožuja. Tam dźěla energiju po třoch modelach. Prěni model je zhromadna připrawa za zdobywanje miliny. To je jenož we wjaceswójbnych domach móžno. Dalši model je zhromadźenstwo wobnowjomneje energije. Wone zmóžnja lokalne dźělenje energije přez trafostacije abo regionalnje z pomocu transformowarnje.