Hač do 31. julija zličichu fachowcy krajneho zarjada za wobswět, ratarstwo a geologiju 200 nadpadow wjelkow na wužitny skót. To je wo wjele wjace hač běchu loni nadpady za cyłe lěto.

Budyšin (SN/dpa/BŠe). Slepo, Rěčicy, Hodźij, Kulow, Ralbicy-Róžant, Njebjelčicy, ... zjednoća, zo je tam wjelk lětsa hižo skoćata torhał. Hač do lěća su fachowcy hižo wjace nadpadow rubježneho zwěrjeća na wužitne zwěrjata zličili hač loni w samsnej dobje. Mjena wjeskow a městow jewja so tuž w statistice škodow, kotruž wjelči běrow krajneho zarjada za wobswět, ratarstwo a geologiju zestaja. Hač do kónca julija bě to 73 padow, w kotrychž je wjelk prawdźepodobnje škodu zawinował. Loni samsny čas bě tomu 57 padow. Potrjechenej stej předewšěm wokrjesaj Budyšin a Zhorjelc.

Čas, hdyž wjelki skót torhaja, pak runje hakle zaběži. Předewšěm nazymu dyrbja plahowarjo zwěrjatow z wjace nadpadami ličić. To je mjenujcy čas, hdyž su młodźata wjelkow tři měsacy stare a hdyž trjebaja wjace picy. Po statistikach minjenych lět su fachowcy najwjace nadpadow rubježneho zwěrjeća w septembrje a oktobrje registrowali.